OpenAI компани ирэх 12 дугаар сараас эхлэн ChatGPT болон кодын агент Codex-ийн хэрэглээний хязгаарыг албан ёсоор нэгтгэхээр боллоо. Мөн энгийн харилцан ярианы «Chat» болон ажлын автоматжуулалтын «Work» горимыг нэг цонхонд нэгтгэж, macOS үйлдлийн системийн хуучин «ChatGPT Classic» хувилбарын үйлчилгээг 2027 оны нэгдүгээр сарын 30-нд бүрмөсөн зогсоохоо хэрэглэгчдэдээ мэдэгдэв.
Нэгдсэн квот: ChatGPT болон Codex токеноо хуваалцана
OpenAI-аас хэрэглэгчдэд илгээсэн албан ёсны цахим мэдэгдэлд дурдсанаар 12 дугаар сараас Plus, Pro, Business багцын бүртгэлүүдэд ChatGPT болон Codex нь дундын нэг хязгаараас тооцогдохоор боллоо. Өмнө нь эдгээр хоёр үйлчилгээ тус тусдаа тооцогддог байсан бол цаашид нэгдсэн сангаас сонгосон загварын төрөл, гүйцэтгэх даалгаврын нарийн төвөгтэй байдлаас шалтгаалан токен суутгагдана.
Ингэснээр хоёр үйлчилгээг зэрэг идэвхтэй хэрэглэдэг инженерүүдийн хувьд Codex дээр хийсэн кодын даалгавар нь ерөнхий ChatGPT ярианы үлдэгдэлд шууд нөлөөлнө. Харин OpenAI-ийн тодруулснаар энгийн Instant загвараар хийх өдөр тутмын хөнгөн харилцан ярианууд уг нэгдсэн хязгаараас хасагдахгүй үлдэнэ. Хэрэглэгчид Тохиргоо цэс дэх Usage хэсгээс өөрийн үлдэгдэл болон шинэчлэгдэх хугацааг шууд хянах бөгөөд квот дууссан тохиолдолд хугацаа шинэчлэгдэхийг хүлээх эсвэл нэмэлт кредит худалдан авч хэрэглэх боломжтой юм.
Нэг цонхноос шууд үйлдэл хийх шинэ орчин
Хэрэглэгчийн интерфейсийн шинэчлэлтийн хүрээнд ойрын долоо хоногуудад цөөн тооны хэрэглэгчдэд туршилтын журмаар хүргэж, санал хүсэлтийг нь авсны дараа нийт хэрэглэгчдэд нээхээр төлөвлөжээ.
Шинэ бүтцээр хэрэглэгч асуулт асуух, санаагаа хөгжүүлэх зуураа горим солих шаардлагагүйгээр шууд веб хуудас үүсгэх, үзүүлэн бэлтгэх, веб дээр даалгавар биелүүлэх зэрэг үйлдлийг нэг дороос даалгана:
«Санаа төрөх анхны цэгээс эхлээд ChatGPT бодит даалгаврыг бүрэн дуусгах хүртэлх бүх шат дамжлагыг нэг дороос удирдах боломжтой болно.» — OpenAI
Харин кодын тусгай шийдэл болох Codex нь ChatGPT Desktop программ дотор тусгай ажлын талбар хэлбэрээ хадгалах бөгөөд зөвхөн хэрэглээний лимитийн тооцооллыг нэгтгэж байгаагаараа ялгаатай юм.
2027 оны нэгдүгээр сарын 30: Хуучин Classic хувилбар түүх болно
Өнгөрсөн долдугаар сард шинэчилсэн хувилбар гарснаар Mac үйлдлийн системийн өмнөх программыг ChatGPT Classic болгон нэрийг нь өөрчилсөн билээ. Зарим хэрэглэгчид шинэ бүтцийн олон функцээс зайлсхийж, энгийн хуучин хувилбарыг илүүд үзсээр байсан юм.
Гэвч OpenAI уг хуучин хувилбарын үйлчилгээг 2027 оны нэгдүгээр сарын 30-нд бүрмөсөн хаахаар шийдвэрлэжээ. Хэрэглэгчдийн өмнөх бүх ярианы түүх шинэ хувилбар руу автоматаар шилжиж хадгалагдах тул ажил тасалдах эрсдэлгүй гэдгийг компани баталлаа.
AI агентуудын өрсөлдөөн: Энгийн чатаас бүрэн гүйцэтгэгч рүү
Энэхүү шинэчлэл нь зөвхөн хэрэглээний журам өөрчлөгдөж буй хэрэг биш, харин хиймэл оюуны салбарын өрсөлдөөн энгийн ярианы роботоос бие даан үйлдэл гүйцэтгэдэг агентууд руу шилжиж буйн тод илрэл юм.
Өнгөрсөн есдүгээр сард Anthropic компани Claude чат болон Cowork автоматжуулалтын хэрэгслийг нэг дэлгэцэд нэгтгэсэн билээ. OpenAI мөн энэ чиглэлээр чат болон ажлыг нэгтгэн, дараагийн шатны агентлаг ажлын орчныг бүрдүүлэх өрсөлдөөнд эрчимтэй орж байна.




