БНСУ-ын Машин механизм, материалын хүрээлэн (KIMM) болон Электроник, харилцаа холбооны судалгааны хүрээлэн (ETRI) хамтран Тэжон хот дахь төв байрандаа тус улсын анхны «AI Humanoid Data Factory» буюу хүн дүрст роботын өгөгдөл үйлдвэрлэх төвийг албан ёсоор нээлээ. Доктор Chan Hun Park-аар ахлуулсан уг төсөл нь Солонгос улсыг гаднын роботын өгөгдөл болон суурь загвараас хараат бус болгох стратегийн зорилготой юм.

Яагаад роботод тусгай «өгөгдлийн үйлдвэр» хэрэгтэй вэ?

Текст болон зургийн хиймэл оюуныг интернэт дэх тэрбум тэрбум баримтаар сургаж болдог бол бодит ертөнцөд хувцас эвхэх, машины товчлуур дарах зэрэг биет үйлдэлд зориулсан бэлэн өгөгдөл интернэтэд байдаггүй. Роботын хараа, хэл ба үйлдлийн (VLA) нейрон сүлжээг сургахын тулд үе мөчний өнцөг, даралтын хүч, камерын дүрс болон хөдөлгөөний замыг миллисекунд бүрээр бүртгэх шаардлагатай байдаг.

1,000 ам метр талбай ба 12 KAIROS роботын битүү мөчлөг

Хоёр давхар бүхий 1,000 ам метр талбайтай уг байгууламжид одоогоор дотоодын KAIROS платформ зэрэг 12 хүн дүрст робот зэрэг ажиллаж байгаа бөгөөд ойрын хугацаанд тоог нь 25 болгон нэмэгдүүлэхээр төлөвлөжээ. Сургалтын үйл явц дөрвөн шатлалтай битүү мөчлөгөөр явагдана:

  • Алсын удирдлагатай бичлэг: Операторууд роботуудыг алсаас удирдан нарийн үйлдлүүд гүйцэтгүүлж, мөч бүрийн мэдрэгчийн болон хөдөлгөөний өгөгдлийг серверт хадгална.
  • Үйлдвэрлэл ба ахуйн хос орчин: Нээлтийн үеэр роботууд автомашины бүхээг доторх товчлуур, хөшүүргийг нарийн дарахаас гадна хөргөгчөөс зүйл гаргах, угаасан хувцас цэгцлэх, буйдан засах зэрэг өдөр тутмын ажлуудыг гүйцэтгэн өгөгдөл цуглуулж үзүүлэв.
  • Загвар сургалт ба бодит шалгалт: Цугларсан өгөгдлөөр хиймэл оюуны загварыг сургаад буцаан биет робот дээр суулгаж, хүний оролцоогүйгээр даалгаврыг хэрхэн гүйцэтгэж байгааг шалгадаг.

2027 оны сүүлээр дотоодын компаниудад нээлттэй болно

KIMM-ийн ерөнхийлөгч Seog-Hyeon Ryu «Өндөр чанартай роботын даалгаврын өгөгдлийг их хэмжээгээр бүрдүүлэх нь үндэсний технологийн өрсөлдөх чадварын амин сүнс юм» хэмээн онцолсон байна. Тус төвд хуримтлагдсан өгөгдлийн сан болон туршилтын дэд бүтцийг 2027 оны сүүлээс эхлэн Өмнөд Солонгосын робот үйлдвэрлэгч компаниуд, гарааны бизнес болон их сургуулиудад үе шаттайгаар нээлттэй болгож, үндэсний хэмжээний экосистем үүсгэх ажээ.